ສິມເກົ່າວັດລ້ອງແຈ້ງ ເປັນສຶມໜຶ່ງທີ່ມີຄວາມເກົ່າແກ່ ແລະ ມີຄວາມສວຍງາມທາງດ້ານປະຕິມະກຳການຕົກແຕ່ງ, ການແກະສະລັກຫລວດລາຍຕ່າງໆທາງ ເຊິ່ງມີລັກສະນະຮູບຊົງແບບລາວເດີມ, ເປັນສິມຫລັງທຳອິດ ແລະ ສິມດຽວທີ່ມີຢູ່ໃນເຂດເມືອງລ້ອງແຈ້ງ, ຖືກສ້າງຂຶ້ນໃນປີ ຄ.ສ 1966 ເຊິ່ງແມ່ນນາຍພົນວາງປາວ ເປັນຄົນນຳພາ ແລະ ສະໜອງງົບປະມານໃນການຈ້າງນາຍຊ່າງມາຈາກອຸດອນ (ປະເທດໄທ) ມາຮັບເໝົາກໍ່ສ້າງ ປະກອບມີສິມ 1 ຫລັງມີຂະໜາດ 14X20 ແມັດ ເພື່ອເປັນສະຖານທີ່ເກັບມ້ຽນຊັບສົມບັດທາງສາດສະໜາ, ອາຮາມ 1 ຫລັງ ຂະໜາດ10X25ແມັດ ໃຊ້ເປັນບ່ອນທຳພິທີທາງສາດສະໜາ ແລະ ກໍ່ສ້າງກຸຕິ 1 ຫລັງ ຂະໜາດ 8 X12 ແມັດ ໃຊ້ເປັນທີ່ພັກຂອງພະສົງສໍາມະເນນ ເຊິ່ງລວມມູນຄ່າປະມານ12 ລ້ານກີບ. ວັດຖຸປະສົງໃນການສ້າງແມ່ນ ເພື່ອໃຫ້ເມຍນ້ອຍ ແລະ ປະຊາຊົນທີ່ອາໃສຢູ່ໃນບ້ານລ້ອງແຈ້ງ ແລະ ໝູ່ບ້ານອ້ອມຂ້າງ ໄດ້ມີບ່ອນສັກກາລະບູຊາ, ກາບໄຫວ້ ແລະ ຕັກບາດທຳບຸນ ຕາມຮີດສິບ 12 ຕອງ 14, ຮີດຄອງປະເພນີອັນດີງາມຂອງຄົນລາວຊາວພຸດ.

ສິມເກົ່າວັດຈອມແຈ້ງ ຕັ້ງຢູ່ເທດສະບານເມືອງລ້ອງແຈ້ງ ເຊິ່ງເປີດໃຫ້ນັກທ່ອງທ່ຽວເຂົ້າໄປທ່ຽວຊົມກາບໄຫວ້ສັກກະລະບູຊາທຸກໆວັນ ແລະ ສາມາດເຂົ້າເຖິງໄດ້ຢ່າງສະດວຍສະບາຍ ດ້ວຍການນຳໃຊ້ລົດທຸກຊະນິດ ຫລື ຍ່າງໄປທ່ຽວຊົມກໍໄດ້.