ແຂວງໄຊສົມບູນ ເປັນເຈົ້າພາບຈັດກອງປະຊຸມ ສົ່ງເສີມການທ່ອງທ່ຽວ 6 ແຂວງພາກກາງ ຄັ້ງທີ X

ກອງປະຊຸມ ສົ່ງເສີມການທ່ອງທ່ຽວເຊື່ອມຕໍ່ 6 ແຂວງພາກກາງ ຄັ້ງທີ X  ທີ່ແຂວງໄຊສົມບູນເປັນເຈົ້າພາບ ໄດ້ຈັດຂື້ນໃນຕອນເຊົ້າຂອງວັນທີ 17 ກຸມພາ 2021 ທີ່ສະໂມສອນເມືອງອະນຸວົງ. ໂດຍການເຂົ້າຮ່ວມເປັນປະທານຂອງທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ, ທ່ານ ຕົ່ງ ມົວ ຊົວໂກ້ ຮອງເຈົ້າແຂວງໄຊສົມບູນ, ຫົວໜ້າພະແນກ ຖວທ ແຂວງ, ທ່ານ ຄໍາແຫວນ ປັນຍານຸວົງ ຮອງເຈົ້າແຂວງບໍລິຄໍາໄຊ, ທ່ານ ປ.ອ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ, ມີຫົວໜ້າກົມ, ຮອງກົມ, ຫົວໜ້າ-ຮອງຫົວໜ້າພະແນກ ຖວທ ຈາກ 6 ແຂວງພາກກາງຄື ນະຄອນຫຼວງວຽງຈັນ, ແຂວງວຽງຈັນ, ແຂວງໄຊສົມບູນ, ແຂວງບໍລິຄໍາໄຊ, ແຂວງຄໍາມ່ວນ, ແລະ ແຂວງສະຫວັນນະເຂດ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂອກາດດັ່ງກ່າວ ທ່ານ ອຸ່ນທວງ ຂາວພັນ ໄດ້ມີຄໍາເຫັນກ່າວເປີດກອງປະຊຸມ ໂດຍທ່ານໄດ້ຍົກໃຫ້ເຫັນເຖີງຄວາມໝາຍສໍາຄັນຂອງວຽກງານທ່ອງທ່ຽວ ຊື່ງເປັນຂະແໜງການໜື່ງທີ່ມີທ່າແຮງຂະຫຍາຍຕົວສູງພໍສົມຄວນ ທັງສ້າງລາຍຮັບເປັນເງິນຕາຕ່າງປະເທດໄດ້ຫຼາຍໃນອັນດັບ 3 ຂອງ ສປປ ລາວ ແລະ ຍັງເປັນຂະແໜງການທີ່ສ້າງວຽກເຮັດງານທໍາໃຫ້ປະຊາຊົນເຂດຕົວເມືອງ ແລະ ຊົນນະບົດ ພ້ອມນັ້ນ ທ່ານຍັງໄດ້ຮຽກຮ້ອງໃຫ້ພຸາກພາກສ່ວນຈົ່ງນໍາເອົາ ໃຈໃສ່ໃນການປຶກສາຫາລືກັນ ເພື່ອຊອກຫາວິທີທາງປັບປຸງແກ້ໄຂບັນດາຂໍ້ຄົງຂ້າງ ພ້ອມທັງວາງແຜນຟື້ນຟູການທ່ອງ ທ່ຽວ ພາຍຫຼັງການແຜ່ລະບາດຂອງພະຍາດໂຄວິດ 19 ເພື່ອໃຫ້ວຽກງານທ່ອງທ່ຽວໄດ້ຮັບການພັດທະນາຕາມມາດຕະ ຖານ ແລະ ມີຄວາມຍືນຍົງ. ຈາກນັ້ນ ຜູ້ເຂົ້າຮ່ວມ ໄດ້ຮັບຟັງລາຍງານການຈັດຕັ້ງປະຕິບັດບັນດາກິດຈະກຳສົ່ງເສີມການທ່ອງທ່ຽວເຊື່ອມຕໍ່ 6 ແຂວງພາກກາງ ໃນໄລຍະຜ່ານມາ ແລະ ແຜນກິດຈະກຳສົ່ງເສີມການທ່ອງທ່ຽວເຊື່ອມຕໍ່ 6 ແຂວງພາກກາງ ປີ 2021-2023 ເພື່ອຟື້ນຟູການທ່ອງທ່ຽວຈາກການແຜ່ລະບາດພະຍາດໂຄວິດ 19 ໂດຍໄດ້ກຳນົດວຽກງານທ່ອງທ່ຽວມີ 8 ກິດຈະກຳ, ວຽກງານໂຄສະນາການທ່ອງທ່ຽວ ມີ 14 ກິດຈະກຳ, ວຽກງານຄຸ້ມຄອງການ ທ່ອງທ່ຽວ ມີ 25 ກິດຈະກຳ ແລະ ວຽກງານພັດທະນາບຸກຄະລາກອນການທ່ອງທ່ຽວ ມີ 8 ກິດຈະກຳ. ຈາກນັ້ນ ຜູ້ເຂົ້າຮ່ວມຈາກແຕ່ລະພາກສ່ວນ ໄດ້ພ້ອມກັນປະກອບຄໍາຄິດຄໍາເຫັນຕໍ່ບາງກິດຈະກຳ ເພື່ອໃຫ້ແທດເໝາະ ແລະ ສອດ ຄ່ອງກັບສະພາບການຂອງແຕ່ລະແຂວງ. ທັງນີ້ກໍເພື່ອໃຫ້ຂະແໜງທ່ອງທ່ຽວໄດ້ຮັບການພັດທະນາໄປຕາມທິດຟື້ນຟູທີ່ໄດ້ກໍານົດໄວ້ ທັງສຸມໃສ່ 5 ເປົ້າໝາຍຫຼັກຄື ຟື້ນຟູດ້ານເສດຖະກິດ, ຟື້ນຟູຄວາມເຊື່ອໝັ້ນຂອງນັກທ່ອງທ່ຽວທັງພາຍໃນ ແລະ ຕ່າງປະເທດ, ຟື້ນຟູ ແລະ ປັບປຸງຄຸນນະພາບຂອງສະຖານທີ່ທ່ອງທ່ຽວ ຫຼື ຈຸດໝາຍປາຍທາງຂອງການທ່ອງທ່ຽວ, ໂຄສະນາການທ່ອງທ່ຽວ ໂດຍການກໍານົດຕະຫຼາດເປົ້າໝາຍຄືນໃໝ່-ສຸມໃສ່ໂຄສະນາດ້ວຍລະບົບເຕັກໂນໂລຊີ ແລະ ການຮ່ວມມືລະຫວ່າງພາກລັດ-ທຸລະກິດ ແລະ ປະຊາຊົນທ້ອງຖີ່ນ. ໂອກາດນີ້ ທ່ານ ຮອງລັດຖະມົນຕີກະຊວງ ຖວທ ຍັງໄດ້ນໍາຄອມພິວເຕີຕັ້ງໂຕະ ຈໍານວນ 2 ຊຸດ, ປື້ມທ່ອງທ່ຽວລາວ ຈໍານວນ 30 ຫົວ, ຖົງຜ້າທ່ອງທ່ຽວ ຈໍານວນ 40 ໃບ, ແຜນພັດການທ່ອງທ່ຽວ 6 ແຂວງພາກກາງ ແລະ ທ່ອງທ່ຽວລາວ 18 ແຂວງ ຈໍານວນໜື່ງ ມາມອບໃຫ້ພະແນກ ຖວທ ແຂວງໄຊສົມບູນ ເພື່ອຮັບໃຊ້ວຽກງານນໍາອີກ.