ແຂວງໄຊສົມບູນ, ແຂວງຫລວງພະບາງ ແລະ ແຂວງວຽງຈັນ ເຊັນບົດບັນທຶກເຂດແດນເຊື່ອມຕໍ່ ຮ່ວມກັນ

ພິທີລົງນາມເຊັນບົດບັນທຶກເຂດແດນເຊື່ອມຕໍ່ລະຫວ່າງ ແຂວງໄຊສົມບູນ ກັບແຂວງຫລວງພະບາງ ແລະ ແຂວງວຽງຈັນ ໄດ້ຈັດຂຶ້ນໃນວນທີ 2 ກຸມພາ ນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາ ແຂວງໄຊສົມບູນ ລະຫວ່າງ ທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ທ່ານ ບຸນເລື່ອນ ມະນີວົງ ຮອງເຈົ້າແຂວງຫລວງພະບາງ ແລະ ທ່ານ ບຸນສອນ ເພັດລາວັນ ຮອງເລຂາພັກ ແຂວງວຽງຈັນ ໂດຍມີຫົວໜ້າພະແນກການ, ອົງການ, ກົມກອງອ້ອມຂ້າງແຂວງ, ມີການນຳເມືອງ 5 ເມືອງທົ່ວ ແຂວງໄຊສົມບູນ ແລະ ການນຳເມືອງ ທັງສອງແຂວງ ທີ່ມີຊາຍແດນຕິດກັບແຂວງໄຊສົມບູນ ເຂົ້າຮ່ວມເປັນສັກຂີພີຍານ.

ການລົງນາມເຊັນບົດບັນທຶກເຂດແດນເຊື່ອມຕໍ່ຄັ້ງນີ້ ກໍ່ເພື່ອເຮັດການແກ້ໄຂເຂດແດນເຊື່ອມຕໍ່ລະຫວ່າງ ແຂວງໄຊສົມບູນ ກັບແຂວງຫລວງພະບາງ ແລະ ແຂວງວຽງຈັນ ໃຫ້ສຳເລັດຕາມຄາດໝາຍທີ່ກຳນົດໄວ້ ແລະ ເປັນເອກະພາບທາງດ້ານເຂດແດນເຊື່ອມຕໍ່ ເພື່ອໃຫ້ເຂດແດນເຊື່ອມຕໍ່ຂອງແຕ່ລະແຂວງມີຄວາມຊັດເຈນ, ມີຄວາມສະດວກໃນການຄຸ້ມຄອງ ແລະ ນຳໃຊ້ໄດ້ດີຂຶ້ນກວ່າເກົ່າ.

ໃນນີ້ ເຂດແດນເຊື່ອມຕໍ່ ລະຫວ່າງແຂວງໄຊສົມບູນ ແລະ ແຂວງຫລວງພະບາງ ຜ່ານການກວດກາເຂດແດນເຊື່ອມຕໍ່ລະຫວ່າງສອງແຂວງແມ່ນບໍ່ມີຂໍ້ຂັດແຍ່ງ ໄດ້ເປັນເອກະພາບໃຫ້ສືບຕໍ່ຈັດຕັ້ງປະຕິບັດຕາມບົດບັນທຶກທີ່ໄດ້ເຊັນຮ່ວມກັນໃນປີ 1999 ສຳລັບເຂດແດນລະຫວ່າງແຂວງໄຊສົມບູນ ແລະ ແຂວງວຽງຈັນ ແມ່ນໄດ້ແກ້ໄຂຮ່ວມກັນຈຳນວນ 3 ຈຸດ ຄື: ຈຸດທີ1 ລະຫວ່າງບ້ານສັນປາຕອງ ເມືອງລ້ອງຊານ ແຂວງໄຊສົມບູນ ແລະ ບ້ານວັງເຮືອ ເມືອງທຸລະຄົມ ແຂວງວຽງຈັນ ຊຶ່ງທາງແຂວງໄຊສົມບູນ ໄດ້ສະເໜີຂໍພື້ນທີ່ໃນການຄຸ້ມຄອງຕື່ມໃຫ້ເໝາະສົມແກ່ການຄຸ້ມຄອງຂອງປະຊາຊົນທັງສອງແຂວງ ໃນເນື້ອທີ່ປະມານ 20 ກິໂລຕາແມັດ ຜ່ານການຄົ້ນຄວ້າຂອງຄະນະຮັບຜິດຊອບແກ້ໄຂຊາຍແດນ ສາມາດແກ້ໄຂໃຫ້ແຂວງໄຊສົມບູນ ຈຳນວນເຄີ່ງໜຶ່ງ ໃນເນື້ອທີ່ປະມານ 8 ກິໂລຕາແມັດ

ຈຸດທີ 2 ລະຫວ່າງບ້ານສັນປາຕອງ ເມືອງລ້ອງຊານ ແລະ ບ້ານຫ້ວຍປຸ່ງ ເມືອງແກ້ວອຸດົມ ແຂວງວຽງຈັນ ຜ່ານການກວດກາເຂດແດນເຊື່ອມຕໍ່ລະຫວ່າງສອງແຂວງແລ້ວ ບ້ານຫ້ວຍປຸ່ງ ຂອງແຂວງວຽງຈັນ ໄດ້ຕົກມາຢູ່ໃນພື້ນທີ່ການຄຸ້ມຄອງຂອງແຂວງໄຊສົມບູນ ດັ່ງນັ້ນຄະນະຮັບຜິດຊອບແກ້ໄຂເຂດແດນເຊື່ອມຕໍ່ ຈຶ່ງໄດ້ຄົ້ນຄວ້າ ແລະ ເປັນເອກະພາບແກ້ໄຂໃຫ້ແຂວງວຽງຈັນ ໃນເນື້ອທີ່ 20 ກິໂລຕາແມັດ. ຈຸດທີ 3 ລະຫວ່າງບ້ານໂພນພະ ເມືອງອະນຸວົົງ ແຂວງໄຊສົມບູນ ແລະ ບ້ານນໍ້າພາວ ເມືອງວັງວຽງ ແຂວງວຽງຈັນ ຕໍ່ກັບຈຸດດັ່ງກ່າວສອງບ້ານໄດ້ມີຂໍ້ຂັດແຍງຍ້ອນແຜນທີ່ຈັດສັນທີ່ດິນຈຸລະພາກປີ 2011 ແລະ ບົດບັນທຶກປີ 1999 ມີການທັບຊ້ອນກັນ ດັ່ງນັ້ນຄະນະຮັບຜິດຊອບແກ້ໄຂເຂດແດນເຊື່ອມຕໍ່ຈຶ່ງລົງສຳຫລວດຕົວຈຶ່ງ ແລະ ສາມາດຕົກລົງເປັນເອກະພາບຄື: ເລີ່ມແຕ່ກາງຂົວນໍ້າພ້າວລ່ອງລົງໄປຫາປາກນຳ້ພ້າວປ່ອງໃສ່ນຳ້ເຕັນ ຈຸດພິກັດ E245383 N207509 8 ຕັດຂຶ້ນໄປໃສ່ສວນຢາງພາລາ ແລະ ໜອງປາຂອງທ່ານ ອຳຄາ ແລ້ວຂຶ້ນໄປຈຸດພິກັດ E245908 n2074150 ລັດໃສ່ພິກັດ E245920 N2073487ພູຜາເຫລືອງ ( ຈອມພູທີ່ຢູ່ເຄິ່ງກາງ ) ເລາະພູຜາເຫລືອງຂຶ້ນໄປຫາເຂດແດນເຊື່ອມຕໍ່ປີ 1999 ເປັນຊາຍແດນລະຫວ່າງສອງເມືອງດັ່ງກ່າວ.