ທ່ານ ພົຕ ຄໍາລຽງ ອຸທະໄກສອນ ພ້ອມດ້ວຍຄະນະ ລົງຢຽ້ມຢາມ ແລະ ຊຸກຍູ້ 4 ໂຄງການກໍ່ສ້າງ ຢູ່ເມືອງລ້ອງແຈ້ງ

ເນື່ອງໃນໂອກາດ ທີ່ທ່ານ ພົຕ ຄໍາລຽງ ອຸທະໄກສອນ ເຈົ້າແຂວງໄຊສົມບູນ ພ້ອມດ້ວຍຄະນະ ລົງຕິດຕາມ-ຊຸກຍູ້ ວຽກງານເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນ ແຂວງໄຊສົມບູນ ຊຸດທີ II ຢູ່ເມືອງລ້ອງແຈ້ງ ລະຫວ່າງວັນທີ 18 ຫາ 19 ກຸມພາ 2021 ຜ່ານມານີ້ ທ່ານ ແລະ ຄະນະ ຍັງໄດ້ລົງຢຽ້ມຢາມ ແລະ ຊຸກຍູ້ບັນດາໂຄງການກໍ່ສ້າງ ຄື ໂຄງການກໍ່ສ້າງລະບົບນໍ້າປະປາ ພາຍໃນເທດສະບານເມືອງ, ໂຄງການກໍ່ສ້າງຕຶກອາຄານຫ້ອງວ່າການເມືອງ, ໂຄງການກໍ່ສ້າງເສັ້ນທາງເຂົ້າຫາບ້ານໜອງພູນໄຊ ແລະ ໂຄງການກໍ່ສ້າງເສັ້ນທາງປູຢາງສອງຊັ້ນແຕ່ຂົວນໍ້າຍອນ ເມືອງອະນຸວົງ ຫາ ເຂດແດນເມືອງວັງວຽງ ແຂວງວຽງຈັນ (ເຂດບ້ານນາມອນ), ໂດຍການນໍາພາຂອງທ່ານ ອິນຕອງ ໂຄດປັນຍາ, ເຈົ້າເມືອງລ້ອງແຈ້ງ ແລະ ທ່ານ ແຮ ວົງສຸວັດ ອາດິດເຈົ້າເມືອງລ້ອງແຈ້ງ, ສະມາຊິກສະພາປະຊາຊົນ ປະຈໍາເມືອງລ້ອງແຈ້ງ  ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

         ສໍາລັບການຊຸກຍູ້ບັນດາໂຄງການກໍ່ສ້າງໃນຄັ້ງນີ້ ທ່ານເຈົ້າແຂວງພ້ອມດ້ວຍຄະນະ ໄດ້ຮັບຟັງລາຍງານການຈັດຕັ້ງປະຕິບັດບັນດາໜ້າວຽກ ຂອງແຕ່ລະໂຄງການ ໂດຍສະເພາະແມ່ນບັນຫາຕ່າງໆ ທີ່ເຮັດໃຫ້ການກໍ່ສ້າງມີຄວາມຫຍຸ້ງຍາກ ແລະ ຊັກຊ້າ.  ຈາກນັ້ນ ທ່ານໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ກໍຄືເຈົ້າຂອງໂຄງການ ແລະ ບໍລິສັດຮັບເໝົາກໍ່ສ້າງ ຈົ່ງເອົາໃຈໃສ່ສືບຕໍ່ຈັດຕັ້ງປະຕິບັດບັນດາໜ້າວຽກຕ່າງໆຂອງແຕ່ລະໂຄງການ ໂດຍມອບໃຫ້ພະແນກໂຍທາທິການ ແລະ ຂົນສົ່ງແຂວງ ສົມທົບກັບຫ້ອງການໂຍທາທິການ ແລະ ຂົນສົ່ງ ເມືອງລ້ອງແຈ້ງ ປະສານຫາບໍລິສັດຮັບເໝົາກໍ່ສ້າງໂຄງການນໍ້າປະປາ ໃຫ້ມາສະເໜີໂຕ ແລະ ລາຍງານບັນດາໜ້າວຽກທີ່ໄດ້ດໍາເນີນໃນໄລຍະຜ່ານມາ ພ້ອມທັງຊອກຫາບໍລິສັດທີ່ມີຄວາມຄວາມສາມາດ ແລະ ປະສົບການທາງດ້ານວຽກງານດັ່ງກ່າວ ເພື່ອມາຮັບເໝົາກໍ່ສ້າງຕໍ່ໃຫ້ສໍາເລັດ, ສໍາລັບໂຄງການກໍ່ສ້າງຕຶກອາຄານຫ້ອງວ່າການເມືອງລ້ອງແຈ້ງ ແມ່ນໃຫ້ບໍລິສັດເພີ່ມກໍາມະກອນຕື່ມ ເພື່ອໃຫ້ສໍາເລັດໜ້າວຽກຕັດຫຼັງຄາກ່ອນລະດຸຝົນ ພ້ອມນັ້ນ ໂຄງການກໍ່ສ້າງເສັ້ນທາງເຂົ້າຫາບ້ານໜອງພູນໄຊ ແລະ ເສັ້ນທາງປູຢາງສອງຊັ້ນແຕ່ຂົວນໍ້າຍອນ ເມືອງອະນຸວົງ ຫາ ເມືອງວັງວຽງ ແຂວງວຽງຈັນ ກໍຕ້ອງເອົາໃຈໃສ່ຈັດຕັ້ງປະຕິບັດໃຫ້ສໍາເລັດວຽກໜ້າດິນຕັດກ່ອນລະດູຝົນເຊັ່ນກັນ. ພ້ອມນັ້ນ, ທ່ານເຈົ້າແຂວງ ພ້ອມດ້ວຍຄະນະ ຍັງໄດ້ຖືໂອກາດດັ່ງກ່າວ ລົງຢ້ຽມຢາມສູນກະສິກໍາ ປະຈໍາບ້ານໜອງພູນໄຊນໍາອີກ.