ທ່ານ ເຈົ້າແຂວງໄຊສົມບູນ ພ້ອມດ້ວຍຄະນະ ລົງຕິດຕາມ-ຊຸກຍູ້ວຽກງານເລືອກຕັ້ງ ສະມາຊິກສະພາແຫ່ງຊາດ ແລະ ສະພາປະຊາຊົນ ຢູ່ເມືອງລ້ອງແຈ້ງ

         ທ່ານ ພົນຕີ ຄໍາລຽງ ອຸທະໄກສອນ ກຳມະການສູນກາງພັກ, ເຈົ້າແຂວງໄຊສົມບູນ, ຫົວໜ້າຄະນະກຳມະການເລືອກຕັ້ງຂັ້ນແຂວງ ພ້ອມດ້ວຍຄະນະ ລົງຕິດຕາມ-ຊຸກຍູ້ວຽກງານເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຢູ່ເມືອງລ້ອງແຈ້ງ ລະຫວ່າງວັນທີ 18 ຫາ 19 ກຸມພາ 2021 ນີ້. ໂດຍການຕ້ອນຮັບຂອງທ່ານ ອິນຕອງ ໂຄດປັນຍາ ເຈົ້າເມືອງລ້ອງແຈ້ງ ພ້ອມດ້ວຍຄະນະນໍາຂອງເມືອງເຂົ້າຮ່ວມ.

         ໂດຍຈຸດປະສົງຂອງການລົງຊຸກຍູ້ວຽກງານຢູ່ເມືອງລ້ອງແຈ້ງໃນຄັ້ງນີ້ ກໍເພື່ອຮັບຟັງລາຍງານການເຄື່ອນໄຫວກະກຽມຄວາມພ້ອມດ້ານຕ່າງໆ ຕໍ່ການເລືອກຕັ້ງສະມາ ຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 18  ແລະ ສະມາຊິກພາປະຊາຊົນແຂວງ ຊຸດທີ  II ປະຈໍາແຕ່ລະເມືອງ ເປັນຕົ້ນແມ່ນວຽກງານສັງລວມສະຖິຕິຜົນລະເມືອງຜູ້ມີສິດເລືອກຕັ້ງ, ວຽກງານຈັດຕັ້ງປ້ອງກັນເວນຍາມ, ວຽກງານໂຄສະນາ, ປຸກລະດົມປະຊາຊົນ ແລະ ການສ້າງຂະ ບວນການຕ່າງໆ ຈາກທ່ານເຈົ້າເມືອງລ້ອງແຈ້ງ ແລະ 3 ໜ່ວຍປ່ອນບັດຂອງເມືອງຄື ໜ່ວຍປ່ອນບັດບ້ານລ້ອງແຈ້ງ, ໜ່ວຍປ່ອນບັດບ້ານນໍ້າຊານ ແລະ ໜ່ວຍປ່ອນບັດບ້ານໜອງພູນໄຊ. ພ້ອມນັ້ນ ທ່ານເຈົ້າແຂວງ ຍັງໄດ້ມີຄໍາເຫັນຊີ້ນໍາຕໍ່ຄະນະນໍາເມືອງ ແລະ 3 ໜ່ວຍປ່ອນບັດເລືອກຕັ້ງ ຈົ່ງສືບຕໍ່ໂຄສະນາ, ປຸກລະດົມປະຊາຊົນຜູ້ມີສິດເລືອກຕັ້ງ ດ້ວຍລົງພົບປະ ແລະ ສຶກສາອົບຮົມຢູ່ແຕ່ລະຄົວເຮືອນ ພ້ອມທັງລົງພົບປະ ບັນດາບໍລິສັດທີ່ມີລາຍຊື່ປ່ອນບັດຢູ່ພາຍໃນໜ່ວຍຂອງຕົນ ໃຫ້ມາໃຊ້ສິດເລືອກເອົາຜູ້ແທນທີ່ຕົນມັກ ແລະ ມີຄວາມເຊື່ອໝັ້ນໄປນັ່ງໃນສະພາ ເພື່ອນໍາບັນຫາຕ່າງໆ ຂອງປະຊາຊົນ ໄປຄົ້ນຄ້ວາ, ພິຈາລະນາ ແລະ ແກ້ໄຂ. ນອກນັ້ນ ວຽກງານປ້ອງກັນຊາດ-ປ້ອງກັນຄວາມສະຫງົບ ກໍຕ້ອງສືບຕໍ່ຈັດຕັ້ງປ້ອງກັນເວນຍາມ ໃຫ້ເປັນປົກກະຕິ ທັງນີ້ກໍ່ເພື່ອໃຫ້ການເລືອກສະມາຊິກສະພາແຫ່ງຊາດ ຊຸດທີ IX  ແລະ ສະພາປະຊາຊົນ ຊຸດທີ II ຢູ່ແຂວງໄຊສົມບູນ ໄດ້ດໍາເນີນໄປດ້ວຍຜົນສໍາເລັດ ແລະ ມີຄວາມສະຫງົບປອດໄພ 100%.