ແຂວງໄຊສົມບູນ ຈັດພິທີປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ.

ໃນຕອນເຊົ້າຂອງວັນທີ 1 ມິຖຸນາ 2021 ນີ້ ແຂວງໄຊສົມບູນ ໄດ້ຈັດພິທີປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ກໍ່ຄືວັນເດັກນ້ອຍສາກົນ ທີ່ຄິວລົດເມຂອງແຂວງ ໂດຍການເຂົ້າຮ່ວມຂອງທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ, ພ້ອມດ້ວຍຄະນະນໍາແຂວງ ແລະ ພະນັກງານພະແນກການຕ່າງໆ ອ້ອມຂ້າງແຂວງ ເຂົ້າຮ່ວມຢ່າງຫລວງຫລາຍ ເຊິ່ງແຕ່ລະຄົນທີ່ເຂົ້າຮ່ວມ ແມ່ນໄດ້ຜ່ານການສັກຢາກັນພະຍາດໂຄວິດ-19 ທັງໝົດ.

ໃນພິທີ ທ່ານ ລູຊີ ຢໍລໍເຍ່ຍລົງ, ຫົວໜ້າພະແນກກະສິກໍາ ແລະ ປ່າໄມ້ແຂວງ ໄດ້ລາຍງານກ່ຽວກັບປະຫວັດຄວາມເປັນມາ ຂອງວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ພ້ອມທັງກ່າວເປີດພິທີປູກຕົ້ນໄມ້ຄັ້ງນີ້ ຢ່າງເປັນການ. ສໍາລັບປີ 2021ນີ້ ມີເບ້ຍໄມ້ທີ່ນໍາມາປູກທັງໝົດ 117 ເບ້ຍ, (ປະກອບມີເບ້ຍອາໂວກາໂດ້ ແລະ ເບ້ຍໄຮ)  ໂດຍໄດ້ຈັດແບ່ງໃຫ້ບັນດາພະແນກການອ້ອມຂ້າງແຂວງ ຮັບຜິດຊອບປູກ ພະແນກລະ 2 ຫາ 4 ເບ້ຍ, ເຊິ່ງໄດ້ປູກລຽບຕາມສອງຝາກທາງ ຖະໜົນໄຊຊະນະ ເລີ່ມປູກແຕ່ໜ້າໂຮງໝໍແຂວງ ຫາຫໍຫຼັກເມືອງ  ເພື່ອເປັນໄມ້ປະດັບຕົວເມືອງ ແລະ ໃຫ້ໝາກ ທັງນີ້ກໍເພື່ອເປັນການສະເຫລີມສະຫລອງ ວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 01 ມິຖຸນາ 2021;ເພື່ອເປັນການປູກຈິດສຳນຶກໃຫ້ສັງຄົມ ແລະ ອະນຸຊົນຮຸ້ນສຶບທອດຮູ້ຄຸນປະໂຫຍດ, ຮູ້ອະນຸລັກຮັກສາຕົ້ນໄມ້ແລະ ທັງເປັນການປະກອບສ່ວນໃນການຟື້ນຟູສິ່ງແວດລ້ອມ.