ກອງປະຊຸມທາງໄກ ລະຫວ່າງກຳມາທິການວຽກງານສະມາຊິກສະພາແຫ່ງຊາດ ແລະ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທົ່ວປະເທດ

         ກອງປະຊຸມທາງໄກ ລະຫວ່າງກຳມາທິການວຽກງານສະມາຊິກສະພາແຫ່ງຊາດ ແລະ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ  ທົ່ວປະເທດ ໄດ້ຈັດຂຶ້ນໃນວັນທີ 1 ມິຖຸນາ 2021 ນີ້ ໂດຍການເປັນປະທານຮ່ວມຂອງທ່ານ ຄຳໃບ ດຳລັດ, ຮອງປະທານຄະນະປະຈຳສະພາແຫ່ງຊາດ ແລະ ທ່ານ ສຸບັນ ສະວະບຸດ, ປະທານກຳມາທິການວຽກງານສະມາຊິກສະພາແຫ່ງຊາດ ຊຶ່ງແຂວງໄຊສົມບູນ ເຂົ້າຮ່ວມໂດຍທ່ານ ແດງ ປະທຸມທອງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ແຂວງໄຊສົມບູນ,ປະທານສະພາປະຊາຊົນ ແຂວງ ພ້ອມດ້ວຍສະພາປະຊາຊົນ ແຂວງ ໃນທົ່ວປະເທດ ເຂົ້າຮ່ວມ.

         ໂອກາດດັ່ງກ່າວ ປະທານກອງປະຊຸມ ໄດ້ຕັ້ງບັນຫາເຈາະຈີ້ມ ເພື່ອເປັນທິດໃນການປະກອບຄຳຄິດ-ຄຳເກັນ ໃນວາລະດຳເນີນກອງປະຊຸມ. ຈາກນັ້ນຕາງໜ້າສະພາປະຊາຊົນ ຂັ້ນແຂວງ ທັງ 18 ເຂດເລືອກຕັ້ງ ໃນຂອບເຂດທົ່ວປະເທດ ໄດ້ສຸມທຸກສະຕິປັນຍາຂອງຕົນ ເຂົ້າໃນການປະກອບຄຳຄິດ-ຄຳເຫັນ ໃສ່ຮ່າງມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ບົດສະເໜີ ກ່ຽວກັບການສ້າງຕັ້ງກົງຈັກເສນາທິການ ຂອງສະພາປະຊາຊົນ ຂັ້ນແຂວງ ຊຸດທີ II ດ້ວຍຄວາມຮັບຜິດຊອບສູງ ທັງນີ້ ກໍເພື່ອພ້ອມກັນຄົ້ນຄວ້າ ແລະ ມີຄວາມເປັນເອກະພາບ ໃນການກຳນົດວິທີການຈັດຕັ້ງປະຕິບັດຕົວຈິງ ຕໍ່ບັນຫາທີ່ກອງປະຊຸມໄດ້ຍົກຂຶ້ນ. ຊຶ່ງຮ່າງມະຕິຂອງສະພາແຫ່ງຊາດ ມີຈຸດປະສົງໃນການກຳນົດທີ່ຕັ້ງ, ພາລະບົດບາດ, ສິດ ແລະ ໜ້າທີ່, ໂຄງປະກອບ, ລະບອບປະຊຸມ, ວິທີເຮັດວຽກ ແລະ ການພົວພັນປະສານງານ ເພື່ອຮັບປະກັນ ເຮັດໃຫ້ການປະຕິບັດໜ້າທີ່ວຽກງານ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ໃຫ້ມີປະສິດທິພາບ ແລະ ປະສິດທິຜົນ. ຂະນະດຽວກັນ ຈຸດປະສົງໃນການສ້າງ ແລະ ປັບປຸງກົງຈັກເສນາທິການ ແມ່ນມີຄວາມຈຳເປັນ ເພື່ອສ້າງຄວາມເຂັ້ມແຂງ ໃນການເປັນເສນາທິການ ໃຫ້ແກ່ສະພາປະຊາຊົນ ຂັ້ນແຂວງ ຂອງຕົນ ກໍຄືຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງຕົນຕາມກົດໝາຍ ຊຶ່ງການປັບປຸງກົງຈັກເສນາທິການ ຂອງສະພາປະຊາຊົນ ຂັ້ນແຂວງ ກໍຄືຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ຢ່າງສົມເຫດສົມຜົນ ເພື່ອຕອບສະໜອງກັບຄວາມຮຽກຮ້ອງຕ້ອງກັນ ຂອງໜ້າທີ່ການເມືອງ ແລະ ແທດເໝາະກັບສະພາບຄວາມເປັນຈິງ ຂອງທ້ອງຖິ່ນ ເພື່ອຮັບປະກັນໃຫ້ແກ່ການກຳນົດກົງຈັກເສນາທິການ ຂອງສະພາປະຊາຊົນ ຂັ້ນແຂວງ ເຂົ້າສູ່ລະບົບ ແລະ ມີຄວາມເປັນເອກະພາບ. ທັງໝົດນັ້ນ ກໍເພື່ອເຮັດໃຫ້ວຽກງານສະພາແຫ່ງຊາດ ແລະ ສະພາປະຊາຊົນ ຂັ້ນແຂວງ ໃນຂອບເຂດທົ່ວປະເທດ ໄດ້ເຄື່ອນໄຫວຕາມພາລະບົດບາດ ແລະ ໜ້າທີ່ ຂອງຕົນ ໃນການຮັບໃຊ້ໜ້າທີ່ການເມືອງ ກໍຄືຮັບໃຊ້ຜົນປະໂຫຍດລວມຂອງປະຊາຊົນ ໃຫ້ມີຄວາມຮັດກຸມ ແລະ ມີປະສິດທິພາບດີຂຶ້ນເລື້ອຍໆ.